မင်းတပ်မြို့မှာ စစ်ကောင်စီတပ်တွေရဲ့ တိုက်ခိုက်မှုကြောင့် ဒေသခံ တော်တော်များများ မြို့ပြင်ထွက်ပြေးတိမ်းရှောင်ကြပြီး တချို့က ထွက်မပြေးနိုင်ဘဲ မြို့ထဲမှာ ပိတ်မိနေကြပါတယ်။ မြို့ထဲမှာ လူစုလူဝေးရှိမယ်ထင်တဲ့နေရာတွေကို စစ်ကောင်စီတပ်ဖွဲ့က ပစ်ခတ်နေကြတာကြောင့် လူအများအပြားဟာ ပုန်းအောင်းနေကြရတယ်လို့ ဒေသခံတွေက ပြောပါတယ်။
"ဖမ်းမိထားတဲ့ပြည်သူ ၁၅ ယောက်ကို ရှေ့ကနေ လူသားဒိုင်းသဘောမျိုး အကာအကွယ်လုပ်ပြီးတော့မှ မြို့တွင်းကို ဖြည်းဖြည်းချင်းဝင်လာကြတယ်။ သူတို့အဲသလို ဝင်လာပြီကြားကတည်းက မြို့ထဲမှာရှိတဲ့လူငယ်ယောက်ျားတွေအားလုံး မြို့ပြင်ထွက်ရှောင်လာကြတယ်" လို့လည်း ဆိုပါတယ်။
ဒီနေ့မေလ ၁၅ ရက်မနက်ပိုင်း ၆ နာရီကျော်ကျော်အချိန်မှာ စစ်တပ်က ရဟတ်ယာဉ်ပေါ်ကနေ ဗုံးကြဲတိုက်ခိုက်မှုလည်း ပြုလုပ်ခဲ့ပါတယ်။ မင်းတပ်မြို့အနောက်ဖက် ၁၄ မိုင်မှာ ဗုံး၂ လုံးကျပြီး၊ တောင်ပုလုဘုန်းကြီးကျောင်းနဲ့ စံမင်းသီရိစေတီကုန်းတို့အနီးမှာ ဗုံး ၃ လုံးကျရောက်ပေါက်ကွဲခဲ့တယ်လို့ ဒေသခံတွေက ဆိုပါတယ်။
ဘီဘီစီမြန်မာပိုင်း
https://www.bbc.com/burmese/burma-57127285
သတင်းများကို အချိန်နဲ့ တပြေးညီသိရှိနိုင်ဖို့ EDM 017 ရဲ့ Telegram Channel ကို ဝင်လိုက်ပါ
ဝင်ရောက်ရန် > t.me/edm017
